كتب منذ قليل الكابتن محمد الدقة عبر صفحته على فايسبوك معلقًا على بطولة حارة حريك وأزمة الدوري اللبناني، فكتب التالي: صحيح هي دورة ودية حبية الهدف منها الحفاظ على التلاقي والنشاطات بين الفرق، بس الواحد بشوف حالوا بانتماءكن ورجولتكن.. بتكبروا القلب والله انتو وجمهورنا الطيب.. طبعا مبروك لفريق الأنصار والشكر الكبير ل امين سر نادي العهد الشقيق الحاج محمد عاصي ع هالتجمع الحلو يلي عملوا والجهود الكبيرة يلي عم يبذلها لانجاح الدورة. عالهامش، بلشت بعض الأبواق تهمس باتجاه الإتحاد لالغاء الدوري وهيدا الشي غريب لانو كل الشرق الاوسط بركان حرب وما حدن لغى، اليمن..العراق..ايران..سوريا..فلسطين المحتلة رغم كل المآسي بيلعبوا دوري محترفين!!!!!!! الغاء الدوري يعني الغاء اللعبة ومكافأة الفرق المفلسة على حساب الفرق يلي آمنت باصرار الاتحاد على اقامة الدوري بأي شكل كان حفاظاً على سمعتوا وعلى جهوزية منتخبنا الوطني ورسالة للأجيال القادمة.. الأهم الأهم، بعض الفرق قد أبدت رغبتها بالمشاركة بعد انتهاء المدة ونتمنى على الاتحاد اتاحة المجال لكل الفرق الراغبة بأسرع وقت ونتمنى على صديقنا العزيز الريس أسعد السقال أن يعض على الجراح ويتجاوز كل الملاحظات وهو الرجل الوطني بامتياز ويكون نادي النجمة العريق من ضمن الفرق المشاركة.. اذا وجدت النية والرغبة والوطنية نمرر البطولة بتظافر الجميع اذ من غير المعقول ان تلعب البطولات في اراض محتلة او تحت نيران حروب كونية وننحر لعبتنا بأيدينا.