نشر الرئيس التنفيذي لنادي النجمة رامي بيطار على حسابه الخاص فيسبوك التالي:

إلى جمهور النجمة الحبيب، وإلى أهلنا في عائلة كرة القدم اللبنانية…

جمهور النجمة هو قلب هالنادي وقوّته، وأنا بعتزّ بمحبّتكن ووفائكن ووقفتكن حدّ فريقكن. بفهم زعلكن من الكلام المسيء، وبدي أكّد من البداية: كرامة النجمة وجمهورها من كرامتي، والدفاع عن النادي وصون كرامة جمهوره مسؤولية ما بتخلّى عنها.

وبنفس الوضوح، الإساءة مرفوضة من أي جهة صدرت وبحقّ أي طرف، سواء طالت جمهوراً أو نادياً أو رئيساً أو مسؤولاً. والتعرّض للعائلات والكرامات ما إله مكان بمنافسة رياضية، مهما كان الخلاف كبيراً.

من هون، بتوجّه إلكن بمحبة وثقة: خلّونا نتمسّك بقيمنا وبالتشجيع الحضاري، بالملعب وعلى مواقع التواصل الاجتماعي، وما نترك مجال لأي كلام يصبّ الزيت عالنار. من حقّنا نزعل ونعترض وندافع عن نادينا، وفينا نعمل هالشي بكل قوّة ووضوح، وبطريقة بتحفظ كرامتنا وكرامة غيرنا. ما بدي أي مشجّع نجماوي ينجرح بكلمة، ولا بدي كلمة منّا تجرح غيرنا.

وبعتزّ بالعلاقة الطيّبة اللي بتجمعني بالإخوة وسام وباسل ووائل سعد، واللي أساسها المحبّة والاحترام المتبادل. وبيجمعنا كمان حرص مشترك على تطوير كرة القدم اللبنانية، وبنشتغل سوا، ومع باقي الأندية ورؤسائها، لنرفع مستواها ونبني مستقبل أفضل لأنديتنا وجماهيرنا.

وهالعلاقة بتزيد مسؤوليتنا، كمسؤولين، إنّنا نكون قدوة بكلامنا ومواقفنا، وأوّل المبادرين لتهدئة النفوس وحفظ كرامة الجميع. المنافسة بيننا بالملعب بتبقى بكل قوّتها، والاحترام بيننا لازم يبقى ثابت مهما اختلفنا على مباراة أو موقف.

ولأهل جويا وجمهورها، إلكن كل الاحترام والمحبّة. أهلنا بيبقوا أهلنا، ودعوتي للتهدئة والاحترام المتبادل موجّهة للجميع.

خلّونا نحطّ كل هالشغف بدعم فرقنا. النجمة بتقوى بوحدة أهلها ووقفة جمهورها، وأنا معكن لنحافظ على حقّها وكرامتها ونفرح بانتصاراتها.

كل المحبّة لجمهور النجمة العظيم، وكل الاحترام لأهل جويا ولكل أندية لبنان وجماهيرها ..