وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ. الحمدلله على اي حال أجبرت إنو اعتزل كرة القدم بعد ٧ عمليات بركبتي ٣ في اليمين و ٤ في اليسار... هيدا القرار كان لازم من ٣ سنوات اخدو من بعد ٤ عمليات ، قال لي الدكتور الفريد خوري انو لازم يا أيكر توقف فوتبول كرمالك و كرمال مستقبلك انا بتذكر متت هيديك اللحظة من بعد ما خسرت تجربة الأداء مع نادي هامبورغ الألماني بمباراة مع المنتخب الأول ضد نادي النجمة و تعرضت لإصابة رباط الصليبي... بس لبيعرفني بيعرف منيح انو كنت مستحيل أتقبل وقف فوتبول على عمر ٢٣ سنة بعد العملية قررت انو إنسى كل شيء و اتحدى كل شيء بدو يحرمني من هيدي اللعبة و أوصل لحلمي ، عملت العملية و بلشت علاج تحديت حالي تعبت كتير لأوصل لحلمي متلي متل اي لاعب كرة قدم... خلصت علاج و كان كل شيء تمام حكاني شخص من أرمينيا فجأة قال تجي تلعب بأرمينيا ما صدقت من بعد كل شيء عم يصير إرجع إحترف المهم الجواب كان اكيد بجي الحمدلله رحت و توفقت و أول مباراة ودية بالمعسكر ببلغاريا أصبت بقطع بالرباط الصليبي للمرة الثالثة ... الحمدلله رجعنا اجينا و عملنا العملية و قررت انو بلش بعالم التدريب و أعتزل و عملت دورة ال ( C ) بعد سنة و نصف لقيت حالي مرتاح وإجريي الحمدلله مناح صار في اتفاق مع نادي البرج بعد ما نادي البرج و الكابتن محمد الدقة وثق فيني و وقفني على اجريي من اول و جديد الموسم الماضي بس للاسف ما لعبنا و التغت كل البطولات . من فترة صغيرة بلشت حس باجريي الاثنين وجع قوي عملت اللي لازم اعملو متل العادي مع الحكيم بس للاسف بقي يزيد الوجع لحتى قررت و اقتنعت انو انا اكيد هيدا الشيء لمصلحتي و صح كرمال بعدين و لازم اعتزل خلص .. صراحة شيء كتير صعب بس ما بقى قادر جسمي يتحمل.. بس تقرا كلام رب العالمين كل شيء بهون و بصير سهل إنشاء الله. ( أن عوض الله اذا حل، أنساك ما فقدت ) شكر خاص لعيلتي و لكل النوادي اللي لعبت معها و كل المدربين و اللاعبين و لكل شخص كان معي و حدي بكل هيدي السنين...